ನಿಶಬ್ದ ರಾತ್ರಿಗಳಲಿ..
ನಿನ್ನ ನಿಟ್ಟುಸಿರ ಸದ್ದು
ತಾಕುತ್ತದೆ..
ಕಿವಿಯಂಚಲಿ ನವಿರು ಚಳಿ
ಬೆಚ್ಚನೆಯ ಕಣ್ಣೀರು..
ಜಾರುತ್ತದೆ..ನನ್ನ ಕೆನ್ನೆಗುಂಟ ..
ಎದೆಯೊಳಗಿನ ಮಂಜುಗಡ್ಡೆ
ಕರಗುವ ಸಮಯ...
ಕಿಟಕಿಯಲಿ ತೂಗು ಬಿದ್ದ ಚಂದ್ರ..
ತಣ್ಣಗೆ ನೋಡುತ್ತಾನೆ...
ಎಲ್ಲ ತಿಳಿದವನಂತೆ....
ಗರಿಯಲುಗಿಸಿ ನಗುವ ತೆಂಗಿನ ಮರದ..
ಹೂ ಹೀಚಿಗೂ ಗೊತ್ತು..
ನಾನು ಅಳುತ್ತಿದ್ದೇನೆ..
ಸುಮ್ಮ್ಮ ಸುಮ್ಮನೆ ಕಣ್ಮುಂದೆ ಸುಳಿಯುತ್ತವೆ..
ನೀಲಿ ಹಕ್ಕಿಯ ಚಿತ್ರ
ಹೂ ಬಿಟ್ಟ ರೆಂಜೆ ಮರದಡಿ ನಾನು_ನೀನು..
ಮಾಲಿನಿ ನದಿಯ ಜೊಂಡು ಪೊದೆ..
ಆರಿಸಿ ತಂದ ನುಣುಪು ಕಲ್ಲು...
ಹೊಳೆದ ನನ್ನ ಗಲ್ಲದಲ್ಲಿ..
ಇಳಿದ ನಿನ್ನ ಹಲ್ಲು...
ಮಿಂಚು ಹುಳು ಕಣ್ಣು ಮಿಟುಕಿಸುತ್ತದೆ ..
ಗೊಡೆಯಲ್ಲಿನ ಹಲ್ಲಿ ಲೊಚಗುಟ್ಟುತ್ತದೆ
ಟಿಕ್ ಟಿಕ್.. ಟಿಕ್...
ಗಡಿಯಾರವೂ ತುಸು ಮೆಲ್ಲಗೆ ಚಲಿಸುತ್ತಿದೆ...
ಸಮಯ ಚಲಿಸದಂತೆ ಭಾರವಾಗಿದೆ..
ಇಳಿಬಿದ್ದ ತೂಗುದೀಪದ ಕೆಳಗೆ..
ಅದೇ ಹಳೆಯ ಮಂಚ..
ಹೊರಳಿ ತಬ್ಬಿಕೊಂಡರೆ..
ಕೈ ತುಂಬುವ ಖಾಲಿ ಜಾಗ..
ನಡುಗುವ ಬೆರಳುಗಳಿಗೆ ತಗಲುತ್ತವೆ..
ಅಲ್ಲಲ್ಲಿ ಚೆಲ್ಲಿದ ನಿನ್ನ ನೆನಪುಗಳು..
ಉಕ್ಕಿರಿ ಬಿಕ್ಕಿರಿ ಉಸಿರು.
ತಪಿಸುವ ಮನಸಿನ ತುಂಬಾ..
ದುಃಖ ಕಾರ್ಮುಗಿಲು..
ಇಲ್ಲಿ ಎಲ್ಲ ಹಾಗೇ ಇವೆ...
ಕೇವಲ ನಿನ್ನ ಹೊರತು..
ಕೇವಲ ನನ್ನ ಹೊರತು.
No comments:
Post a Comment